ओ भाऊ…
ओ भाऊ…
तुम्ही भूमिका घ्या
पण अट मात्र एकच
आम्हाला आवडेल अशीच घ्या!
ओ भाऊ…
तुमचं म्हणणं मांडा
पण अट मात्र एकच
आम्हाला पटेल असंच मांडा
ओ भाऊ…
तुमचा हक्क सांगा
पण अट मात्र एकच
आम्ही जे सांगतो त्यावरच मांडा
ओ भाऊ…
तुमचा अधिकार ओरबाडून घ्या
पण अट मात्र एकच
आम्ही जे ठरवू तेच तुम्ही ओरबाडा
ओ भाऊ…
जनहिताच्या मुद्यांसाठी रस्तावर या
पण अट मात्र एकच
आमचेच मुद्दे तुम्ही उचला
ओ भाऊ…
क्रांती करायला तयार व्हा
पण अट मात्र एकच
जी आम्ही सांगतो तीच क्रांती करा
ओ भाऊ…
तुमचा विचार मांडा
पण अट मात्र एकच
आमच्या विचाराशी सुसंगत ठेवा
ओ भाऊ…
पेटून उठून बंड करा
पण अट मात्र एकच
काडी आमचीच पेटवा
ओ भाऊ..
रक्तरंजित संघर्षात सामील व्हा
पण अट मात्र एकच
आम्ही सांगू त्याचात रक्तपात करा
ओ भाऊ…
सामाजिक बदलांना सज्ज व्हा
पण अट मात्र एकच
आम्ही सांगतो तोच बदल करा
ओ भाऊ…
ज्वलंत मागण्यांसाठी एकत्र या
पण अट मात्र एकच
आमच्याच मागण्या पुढे करा
ओ भाऊ…
विषमता संपवायला एकजूट करा
पण अट मात्र एकच
आम्ही ठरवू तीच विषमता
ओ भाऊ…
लोकशाही वाचवण्यासाठी मतदान करा
पण अट मात्र एकच
आम्ही सांगू त्यालाच मतदान करा
©️भूषण वर्धेकर
११ ऑक्टोबर २०२६
पुणे
कोणत्याही टिप्पण्या नाहीत:
टिप्पणी पोस्ट करा