विडंबन
मूळ गीतकार - अप्पा कांबळी
बॅनर न् तंबू घेऊन द्या की रं
मला बी आंदोलनात येऊन द्या की
पोरं आलीय रस्त्यावर, बघ गाड्या गेल्या भरभर
त्या जंतर मंतर वर, मांडव टाकूनी बसलेत रातभर
घेऊन जेवण डबाभर, वळकूटं घेऊन खांद्यावर
त्याची गाडी लै भारी, आलंय सामान ढिगभर
पाय पळत्यात सरसर अन् कशी उडतीय झरझर
कांदा न् भाकरी खाऊन द्या की रं
मला बी आंदोलनात येऊन द्या की
पळपळून म्या गावभर, बोंबाबोंब करून आणल्यात पोरंटोरं
आचारी हाय ह्यो चतुर, देतो करूनी स्वयंपाक भरपूर
डायवर हाय लई जोरदार, गाडी हाकायला दूरदूर
मांडव तपावर नेऊन द्या की रं
मला बी आंदोलनात येऊन द्या की
मी टोकाचा हाय कट्टर, नसा ताणून वरडेन गरगर
आपला प्रधान लय् मगरूर, सेवकावर करू कुरकूर
डोक्यामंदी नाही विचार, लावून काडी पेटवा मशाल
अरं लगेच घेऊन जाऊद्या की रं
मला बी आंदोलनात येऊन द्या की
गावपाटलाचा पोरगा जोरदार, नातू पणतू आघाडीवर
गाव पुढाऱ्याचा वारसदार, वरल्या गल्लीचा भाऊ डेंजर
घराशेजारी आपली घरं, लंगोट घालून मैतर
अरं तुमच्यात सामील होऊन द्या की रं
मला बी आंदोलनात येऊन द्या की
©️भूषण वर्धेकर
पुणे
२४ जूलै २०२६
—————————————————————-
जो तो टपून बसलाय
जो तो टपून बसलाय
सोमडीत डाव टाकायला
फक्त टायमिंग महत्वाचे
नंतर आहेच बोंबाबोंब
सगळे धूर्त बेरकी
भरून पोटाची खळगी
लागलीच करती उपोषणे
संधी साधत येती वाटेने
दिसला तंबू की लाव स्पीकर
टाकून मांडव बजाव डफली
फडकवून झेंडा करा पथनाट्य
भरून ट्रकभर येतील माणसं
बाहेरचे घोळके असंतुष्ट
इकोसिस्टिम आहे मजबूत
आतले लपलेले भोंदू
पुरविती रसद गपचूप
बबाल करती माध्यमे
कर्कश्य आकांडतांडव
अजेंड्यावर इप्सित मनसूबे
बातम्यांचे प्रायोजित धबधबे
बळीचे बकरे अमर्यादित
दरवेळी सुनियोजित इव्हेंट
नवा गडी नवा डाव
मुद्दा अखेर सेटलमेंट
घेऊन घाऊक लवाजमा
भरून गर्दीच्या ठिकाणी
भाडोत्री लावून सापळा
उकळूण्यासाठी खंडणी
गंजलेल्या निषेधाचे हत्यार
आवाहन करून भरभर
मांडव तोच संघ नवा
करायला ढोंग मुद्दा हवा
©️भूषण वर्धेकर
१०:१५ रात्रौ
२२ जूलै २०२६
पुणे
