नास्तिकतेची वल्कलं

घेऊन निधर्मीवादाचा झेंडा

पेटवून इहवादाचा डंका

झालाय एकजण नवखा नास्तिक

बिथरला पाहून बहुसंख्य आस्तिक

कोणता सच्चा धार्मिक यावर

करू लागला गहन विचार

कोणती श्रद्धा कोणती अंधश्रद्धा

यातच मनस्थिती झाली द्विधा

जन्मतः असल्याने हिंदू 

जागरूकपणे प्रश्न विचारून

झिडकारल्या रुढी, प्रथा

नाकारल्या परंपरागत आस्था 

सोशिकपणे लागला वाचू

विचारवंतांची पुस्तके मिळवून 

धार्मिक समीक्षा कठोर करून 

विवेकाने निर्णय घेऊन 

मनाशी बांधून एकच तर्क

आपाल्याच विचारात होऊन गर्क

धार्मिक माणूस असतो मुर्ख

अंधश्रद्धाळू तर त्याहून शतमुर्ख

सश्रद्धांची करून टिंगल 

अध्यात्माची करी टवाळी

देवभोळ्यांना उगाच डिवचून

देवदेवतांची उडवी खिल्ली 

लिहून प्रहसन प्रसंगी विडंबने

कैक दिवस यातच लोटले

नाव छापून प्रसिद्ध पावला 

नास्तिकतेचा टेंभा मिरवला 

एक पुरस्कार चालुनी आला

सभा, भाषणे प्रसवू लागला

गावोगावी मागणी वाढली 

गोष्टी, किस्स्यांची महफिल सजली 

विचारवंतांचा शिक्का लागला

वृत्तवाहिन्यांवर लागली वर्णी 

तज्ञ म्हणून समाज पावला 

नास्तिकतेची तत्वे वरकरणी

पाहता पाहता सरली वर्षं 

व्याख्यानांतून दिसला दर्प

मानधनाचे वाढले आकडे

प्रतिस्पर्धींशी झाले वाकडे

उपाय म्हणून स्वतःच्या नावे

सुरु केला एक विचारमंच

कार्यकर्ते जमवून मनोभावे 

तयार केले अनुयायी संघ

समविचारी लोकांचे कोंडाळे 

स्वस्तुती मिरवून बळे बळे

साजरे झाले कौतुक सोहळे

निधर्मी विचारांचे उमाळे 

यातून उभं राहिलं एनजीओ ट्रस्ट 

काही कार्यकर्ते झाले विश्वस्त 

तर काही कारकुनी कामात व्यस्त

नवखा नास्तिक झाला अस्ताव्यस्त 

सुरु झाले दौरे अन् वैचारिक सत्संग 

तोच तो विचार नवनवीन श्रोतृवृंद

रोज नवं ठिकाण रटाळ विचार 

डबक्यात साचलेला बौद्धिक आकार 

अचानक मिळाले एका चॅनेलचे फुटेज

झाले फॉलोअर्स मिरवायला तरबेज 

वाढली गावोगावची मेळाव्यांची रेलचेल 

सोबत वाढता जमाखर्चाचा रोजमेळ

हळूहळू आले स्पॉन्सर्ड पुरस्कार दारी

नास्तिकाची सुरू झाली दुनियादारी 

केली ठशीव केशभूषा वेशभूषा 

विचारांची दैना, किर्ती झाली दशदिशा 

कालांतराने वाढत गेले अनुयायांचे स्टेक्स 

दिमाखात उभे कार्यक्रमांचे चकाचक फ्लेक्स 

वाढता संपर्क अन् गर्दीचा वाढता आलेख 

तयार झाले पंथ, संप्रदायाचे अभिलेख 

झाला नवखा नास्तिक पतित पावन 

कैक देशोदेशीचे झाले अनेकदा भ्रमण

अनुयायांनी केला सुरू वार्षिक महोत्सव 

अखेरीस गळून पडले विवेकी बौद्धिक सौष्ठव 

© भूषण वर्धेकर 

१०/४/२०२२

भुकूम 

तू बोल मराठी

तू बोल मराठी, आवेशपूर्ण अस्मितेसाठी 

तू फोड डरकाळी, एकवटून शक्ती सगळी

तू कर राडा, एकीचा शिकवू चांगलाच धडा

तू हाण कानफटात, उमटू दे बोटं घराघरात 

तू उठव वादळ, होऊ दे त्यांची धावपळ

तू कर तोडफोड, जिरवू त्यांची चांगलीच खोड

तू कर आंदोलन, उधळून त्यांचं मनोमिलन 

तू टाक काड्या, उघडून त्यांच्या लबाड्या 

तू लिही पत्र, व्हायरल आम्ही करू सर्वत्र 

तू कर भाषणबाजी, आम्ही करू दमबाजी

तू मार पाचर, भांबावून सोडू स्थिर चराचर 

तू ठोक खिळा, मिरवू आम्ही रक्तरंजित टिळा

तू कर खलबतं, आम्ही खातो फटके हितं

तू उडव धुराळा, करू सुव्यवस्थेचा चोळामोळा

तू कर टोलबंदी, नाक्यावर करू तोडफोड नांदी

तू कर खेळखट्याक, तोडू पाट्या देतो सट्याक

तू पेटव मशाल, तापवून करू हाल बेहाल 

तू लाव जाळ, करू ठिकऱ्या उडवून राळ

तू मिरव टेंभा, पदाधिकाऱ्यांना पुरवून खंबा

तू मार पलटी, कार्यकर्त्यांना पाजून चपटी

© भूषण वर्धेकर 

पुणे 

(कधीकाळी राज ठाकरे, मनसेचा डाय हार्ट फॅन होतो. नंतर समज वाढली. मराठी भाषेचा बोलण्यासाठीचा लढा नंतर फक्त बडवण्यासाठी वापरला गेला आणि सगळं राजकीयदृष्ट्या वापरले गेले. काही वर्षांपूर्वी लिहिले होते. आजही लागू पडते. सदैव हीच परिस्थिती राहणार. हे बदलण्याची शक्यता कमीच. कारण दक्षिणेला आणि उत्तरेला जोडणारा मोठा भौगोलिकदृष्ट्या महाराष्ट्र उभा आडवा पसरलेला आहे. त्यातही सांस्कृतिक, ऐतिहासिक आणि भाषिक आक्रमणं रिचवलेला महाराष्ट्र आहे.)

 

आरक्षणाच्या बैलाला ऽ ऽ ऽ

त्याचं असं झालं, समाजाचं एकदमच बिनसलं

जातीपाती एकवटल्या, आरक्षणाला कंटाळून

संगनमताने सर्वांनी एकच ठराव केला संमत

आम्हाला करा ब्राह्मण, तरच सोडू आरक्षण

एकीकडे प्रत्येकाला पाहिजे होती ब्राह्मण जात

आरक्षणाच्या ठेकेदारांना पटत नव्हते अजिबात

जातीपातीच्या राजकारणाचे नेते झाले उदास

सगळेच झाले ब्राह्मण तर चालणार कसे दुकान

वाटलं होतं सुटेल पेच, पुढ्यात होती खरी मेख

ब्राह्मणात नक्की कोण, होत्या डझनभर शाखा

सगळे ब्राम्हण एकदम, आंदोलनात आले थेट

आधी सांगा कोणते ब्राह्मण, मग ठरवा कोटा

चित्पावन, देशस्थ, कऱ्हाडे की कायस्थ 

सारस्वत चिडले, का आम्हाला वगळता!

सर्वात आधी ठरवा, गौड की द्राविडी 

लगेचच यजुर्वेदींनी मांडल्या पोटजाती 

तेवढ्यात आले देवरुखे, खोत आणि खिस्ती 

सोबतीला होते कनौजी, दैवज्ञ आणि कानडी

अय्यर सरसावले तोच, नंबुद्रींचा वेगळा नारा

कोकणस्थ झाले सावध, देशस्थ उठले भराभरा

शेवटी कोटा ठरवण्यासाठी ठरली बैठक

उत्तरेतील पंचगौड, की दक्षिणेचे पंचद्रविड

नंतर मांडून पोटजाती ठरवा क्रीमी लेअर 

शिक्कामोर्तब होऊन कोटा झाला सूकर

लिखित पाहिजे म्हणून ठरले एकछत्री सूत्र 

तेवढ्यात आला प्रश्न, कोणतं घ्यायचं गोत्र

तयार होत्या वंशावळी, मात्र अडले सगेसोयरे 

बैठक झाली सैरभैर, त्यात काही कावरेबावरे 

नुसत्याच झाल्या चर्चा, वाद थोडी हमरीतुमरी

कागदोपत्री प्रत्यक्षात मात्र दिखावा एकसूरी

कोकणस्थांनी कानोसा घेऊन साधला निशाणा

आम्ही आहोत तुमच्यासोबत सांगून देशस्थांना

अय्यर लढून तीस टक्क्यांत झाले होते मातब्बर 

नंबुद्रींना होता कमी वाटा तरी झाले धीरगंभीर 

कनौजींचा प्रश्न मैथिल उत्कल ब्राह्मणांचं काय?

ठरलं होतं खरं, सगळे एकच ज्याला पवित्र गाय

एवढं सगळं बघत बघत आंदोलक झाले त्रस्त 

जातीपातीच्या प्रश्न समस्या ह्या पेक्षा अस्तव्यस्त

म्होरक्या होता बेरकी, सोबत अनुभवी प्रशासन

आली हळूच मागणी, होऊ दे बहुजन ब्राम्हण

सगळे झाले खूष बघून नवीन होणारी शाखा

वाचल्या आपापल्या पोटजाती अन् उपशाखा 

बहुजन ब्राम्हणी कुळाचार अन् रूढी, परंपरा

यांचेही झाले पाहिजे शासन नोंदणी गोषवारा 

सरतेशेवटी ठरलं काढा घटनात्मक श्वेतपत्रिका 

सगळ्या गोतावळ्यांनी घेतल्या आणाभाका

जे सांगू ते खरं सांगू कागदी पुराव्यानिशी नोंदवू

तडीपार करा कोणी सापडला आमच्यात भोंदू

शासकीय हस्तक्षेप होताच उभा नवीन पेचप्रसंग

घटना कलम, परिशिष्टे पारायणे झाली यथासांग 

बहुजन ब्राम्हण साठी नोंदणीकृत नव्हती तरतूद

आणा दुरुस्ती विधेयक किंवा काढून वटहुकूम

पाच वर्षे सरली, अर्धवट ठेवून श्वेतपत्रिका

सर्वपक्षीय लोकांना दिसू लागल्या निवडणुका

एकाएकी घटना बदलणार,  ठोकली आरोळी

चाणाक्षांनी घेतली भरून आपापली झोळी

येत्या अधिवेशनात येऊन सत्तेत दिले आश्वासन 

करू नोंदणीकृत घटनात्मक बहुजन ब्राम्हण

तोवर जातीपातीच्या नेत्यांनी गाजवली भाषणं

'तरच सोडू आरक्षण' चं वाजत राहिलं तुणतुणं 

© भूषण वर्धेकर 

५ जूलै २०२४

पुणे 

२ नोव्हेंबर २०२३ रोजी सुरू केले लिहिणं 

५ जूलै २०२४ रोजी पूर्ण केले 

बाबाजी की जय हो

बाबाजी की जय हो|

बाबाजी बहोत ज्ञानी थे, 

बस्स उनके अनुयायी बिलकुल हरामी थे|

बाबाजी तो धर्म का प्रचार करते थे,

अनुयायी तो संप्रदाय बनाकर उस का प्रसार करते थे|

बाबाजी तो सभ्यता और संस्कृति के आग्रही थे,

अनुयायी तो रूढ़ि परंपरा लोगों मे थोंपना चाहते थे|

बाबाजी सत्य के पथपर चलने का आदर्श रखते थे, 

अनुयायी झूठ फैलाकर जुमलेबाजी किया करते थे|

बाबाजी के आशीर्वाद के लिये लोक दिवाने थे,

अनुयायी लोगो को चुनकर पंथ बनवाने मे लगे हुएँ थे|

बाबाजी बहोत ज्ञानी थे, 

बस्स उनके अनुयायी बिलकुल हरामी थे|

बाबाजी गांधीवादी होकर सत्य, अहिंसा के पुजारी बने थे, 

अनुयायी तो नथुरामायण का खेल चलाकर हिंसा को चमकाते थे|

बाबाजी तो दिनभर पुजा अर्चा, किर्तन पाठ कर के दिन गुजारते थे, 

अनुयायी तो उसी की सिस्टिम बनाकर घर बसाते थे|

बाबाजी वसुधैव कुटुंबकम् बोलकर तल्लीन हो जाते थे, 

अनुयायी तो बाबाजी को विश्व की सैर करवाते थे|

बाबाजी का संवाद हर सजीव, निर्जीव से होता था, 

अलग अलग देशो मे बाबाजी की प्रतिमा बढाकर अनुयायी का दुकान चलता था|

बाबाजी बहोत ज्ञानी थे, 

बस्स उनके अनुयायी बिलकुल हरामी थे|

बाबाजी का ध्येय तो विश्व कल्याण का था, 

अनुयायी तो कल्याणकारी होकर विश्वभर फैल चुके थे|

बाबाजी सब जनता के प्यारे थे, 

अनुयायी को लेकर सब महिलाए हैरान थी|

बाबाजी का संकल्प बहोत ही दृढ था, 

अनुयायी तो चुनिंदा सरकारों की विकल्प थी|

बाबाजी महान ज्ञानी पंडित बनना चाहते थे, 

अनुयायी तो उनको सर्वज्ञानी महात्मा बना चुके थे|

बाबाजी बहोत ज्ञानी थे, 

बस्स उनके अनुयायी बिलकुल हरामी थे|

बाबाजी हर एक से प्रेम से वार्तालाप किया करते थे, 

अनुयायी की ऑंखे लाल देखकर भक्त लोग परेशान थे|

बाबाजी को सेवाभावी शिष्यो की प्रतिक्षा थी, 

अनुयायी ने तो अंधभक्तोकी फौज बनाकर रखी थी|

बाबाजी हर साल जन्मदिन पर दानधर्म का पुण्य कर्म करते थे, 

अनुयायी तो उसी के लिए सालभर जोर जबरदस्ती चंदा जमा करते थे|

बाबाजी की मुस्कुराहट बहोत ही प्यारी हुआ करती थी, 

अनुयायी तो वही छबी बनाकर मुर्तीया, तसबीर बेचा करते थे|

बाबाजी बहोत ज्ञानी थे, 

बस्स उनके अनुयायी बिलकुल हरामी थे|

बाबाजी दुनिया के सब देशो में विश्वशांती की प्रेरणा बन चुके थे, 

अनुयायी तब अशांतता के स्रोत पैदा करने मे लगे थे|

बाबाजी की इच्छा थी की पुरे विश्व मे सिर्फ मानवता का ही धर्म हो, 

अनुयायी ने तो सब धर्म से मानवता हटाने की ठान ली थी|

बाबाजी कहते, मोक्ष ही अंतिम सत्य है,

अनुयायी जो पसंद नहीं उनको मौत के घाट उतारके मोक्ष दिलवाते थे|

बाबाजी सब जानते थे, अनुयायी से डरकर मौन हो जाते थे,

क्या पता उनको ही मारकर चिरंजीव समाधी बताकर अनुयायी नया संप्रदाय बना सकते थे|

बाबाजी बहोत ज्ञानी थे, 

बस्स उनके अनुयायी बिलकुल हरामी थे|

अंत मे हुआ वही जो अनुयायी चाहते थे,

बाबाजी का देहांत हो गया महानिर्वाण और जन्मदिन बनाया गया जन्मोत्सव|

बाबाजी की जय हो|

© भूषण वर्धेकर 

३० एप्रिल २०२४

तिरुपती, आंध्रप्रदेश 

उठ भक्ता जागा हो

उठ भक्ता जागा हो

बॉयकॉट चा धागा हो

संस्कृतीच्या रक्षणासाठी

भावी पिढीच्या कल्याणासाठी 

उठ गुलामा पेटून उठ

लढण्यासाठी रणशिंग फुंक

भक्तमुजोरीला मोडण्यासाठी

पुरोगामित्व टिकवण्यासाठी

पळ सैनिका जिवानिशी धाव

उचल सतरंज्या खाऊन वडापाव

आदेशाचे पालन करण्यासाठी 

अस्मितेचा अंगार पेटवण्यासाठी

खडबडून जागा हो नवसैनिका

कर खळखट्याक घे आणाभाका 

परप्रांतियांना ठोकण्यासाठी

नवनिर्माण जोपासण्यासाठी 

लाल कॉमरेडा ठोक सलाम

रक्तरंजित संघर्ष कर बेफाम

मॅनिफेस्टोच्या संवर्धनासाठी

शोषितांच्या मतदानासाठी

गर्जून मूलनिवासी घुमू दे नारा

वंचितांचा तूच एकमेव सहारा

सवर्णांना धडा शिकविण्यासाठी

निळ्या क्रांतीच्या उत्थानासाठी

आवळून घट्ट मनगट, हे बिग्रेड्या

तोडफोड कर बनून घरगड्या

सनातन्यांना संपवण्यासाठी 

साहेबांना सत्ता गाजवण्यासाठी 

हे तरुणा, सार्वभौम देशाच्या

कष्टाने मिळवा संधी रोजगाराच्या 

टीचभर पोटाच्या उपजिविकेसाठी

रक्ताच्या नात्यांच्या भरभराटीसाठी 

१९ जूलै २०२३

पुणे

काव्यमय वडापाव

काळ्याकुट्ट मातीत मुळाशी गाडलेला

टुम्म फुगीर रुंद बटाटा पसरलेला

घाऊक बाजाराच्या रचलेल्या पोत्यातून

भल्यामोठ्या पातेलात रटारटा शिजवून

ठेचून चेंदामेंदा झालेली लक्तरे

कांदा मिरची मसाल्याचे फवारे

गोलमटोल गोळे पीठात बुचकळून

ओतीव कढईतल्या तेलात उकळून

लालचुटुक चुराचटणी कणीदार

घोटलेल्या चिंचेचा अर्क पाणीदार

मऊ लुसलुशीत पावात कोंबून

चवीला मीठमिरची कांदा कापून

अटक मटक खवय्यांची चटक

तहानभूक भागवायचं मिथक

दंत ओष्ठ्य जीव्हा खाण्यात दंग 

उदरभरण नोहे अखंड अभंग

©भूषण वर्धेकर

२२ मार्च २०२२

भारतीय स्वातंत्र्य लढ्याचा विजय असो!

स्वातंत्र्य मिळवण्यासाठी सगळेच लढले

कोणी दक्षिणेकडे कोणी पश्चिमेकडे लढले

उत्तरेतील, पुर्वेकडील कैक फासावर चढले

अनेकांनी देशासाठी हौतात्म्य पत्करले

काही जीवानिशी मेले काही होरपळले

विस्कटलेल्या चळवळीत कैक बिथरले

बंड पुकारून कैक त्वेषाने निकराने लढले

राष्ट्रवादी लेखणीचे चित्कार सर्वदूर पोचवले गेले 

परदेशांतून जहालांनी हादरून सोडले

ब्रिटिशांना देशातलेच मवाळ बरे वाटू लागले

हुशारीने राजे राजवाडे आधीच ताब्यात घेतले

संस्थानिकांना हेरून करारबद्ध गुलाम केले

बेरकीपणे काही आंदोलने प्रॉक्टर्ड केली

लोकसहभागातून काही उस्फुर्त झाली

दुसऱ्या महायुद्धात वाताहत अंगलट आली

संभाव्य लष्करी उद्रेकामुळे पाचर बसली

ज्वलंत राष्ट्रवाद्यांच्या जरबेने गांगारुन गेले

मवाळांतील सत्तापिपासू हेरले गेले

ब्रिटिशांनी धर्माधिष्ठित राष्ट्रास बळ दिले

सर्वधर्मसमभावाचे कंबरडेच मोडले

सगळ्यात आधी ब्रिटीशांनी वापरले

नंतर कॉंग्रेसने सत्तेसाठी मिरवले

सर्वदूर सत्य अहिंसा ठसवले गेले

प्रत्यक्षात अहिंसा असत्य वठवले गेले

कित्येक दशकं गांधी बिचारे वापरले गेले

जाज्वल्य सावरकर अडगळीत फेकले गेले

सुटाबुटातून संविधान अंमलात आणले गेले

बाबासाहेब जातीच्या कोंडाळ्यात ढकलले गेले

पंचवार्षिक योजनेचे दिवास्वप्न दाखवले गेले

गोताळ्यातील समाजवादी धनिकांना रेटले गेले 

गावोगावचे जमीनदार सावकार एकवटले गेले

सेक्युलर म्हणवून संस्थानिकं भक्कम केले गेले

व्यक्तींकडून कुटुंबं उच्चभ्रू प्रस्थापित झाले 

विकासाच्या आडून गोरगरीब विस्थापित झाले

नेहरुंचे गुडी गुडी राष्ट्रनिर्भर स्वप्न मिरवले गेले

प्रत्यक्षात मात्र घराणेशाहीचे वारस लादले गेले

भारतीय स्वातंत्र्य लढ्याचा विजय असो!

२७ नोव्हेंबर २०२२

भुकूम, पुणे

Her Voice Her Choice

Her Voice, Her Choice

Her decision, Her life

Her distorted life, Family problem

Her repentance, Curtural problem

Her broken mind, Career problem

Her love life, Society matter

Her success, Women empowerment

Her failures, Male dominance

Her excessive demands, Pampered parents problem

Her chaste emotions, Humiliated men problem

Her social duties, Our religious problem

Her freedom of expression, Progressive beliefs problem 

Her murder, Our problem

Her rape, Patriarchal problem

©Bhushan Vardhekar 

15 November 2022

Pune - 412115

लढाई

आमची लढाई, तुमची लढाई

त्यांची लढाई, ह्यांची लढाई

आतली लढाई, बाहेरची लढाई

गल्लीतील लढाई, दिल्लीतील लढाई

मनातील लढाई, घरातील लढाई

एकट्याची लढाई, दुकट्याची लढाई

शांततेसाठी लढाई, वर्चस्वासाठी लढाई

रक्षणासाठी लढाई, संरक्षणासाठी लढाई

मिरवण्याची लढाई, दिखाव्याची लढाई

आस्तित्वाची लढाई, निकराची लढाई 

अटीतटीची लढाई, मेटाकुटीची लढाई 

शहाण्यांची लढाई, मुर्खांची लढाई

गटागटात लढाई, तटातटात लढाई

सामाजिक लढाई, राजकीय लढाई

जातीअंताची लढाई, जातीपातीची लढाई

विचारांची लढाई, आचारांची लढाई

सत्तेची लढाई, खुर्चीची लढाई

मंत्र्यांची लढाई, नेत्यांची लढाई

पदांची लढाई, प्रतिष्ठेची लढाई

भक्तांची लढाई, गुलामांची लढाई

अंधश्रद्धेशी लढाई, प्रथांशी लढाई

रुढींशी लढाई, परंपरांशी लढाई

दैववादी लढाई, विवेकवादी लढाई

सांस्कृतिक लढाई, सदाचारी लढाई 

पक्ष वाढवण्याची लढाई, पक्ष संपवण्याची लढाई

बंड क्षमवण्याची लढाई, बंड पेटवण्याची लढाई

सरकार करण्यासाठी लढाई, सरकार पाडण्यासाठी लढाई

विरोधकांची अंतर्गत लढाई, विरोधकांची कमीशनची लढाई

जनतेची जगण्याची लढाई, महागाईशी कमाईची लढाई,

बेरोजगारीशी बेकारांची लढाई, शेतकऱ्यांची निसर्गाशी लढाई 

कर्जबाजाऱ्यांची बॅंकेशी लढाई, मजूरांची भांडवलदाराशी लढाई

मानवतेची माणसाशी लढाई, सौहार्दाची ढोंगाशी लढाई 

©भूषण वर्धेकर

३१ मे २०२२

पुणे -४१२११५

फुर्रोगामी फियास्को

आज्ञा पाळणारे आज्ञाधारक

आदेश पाळणारे गुलाम

हुकुम देणारे हुकुमशहा

फतवा मानणारे धार्मिक

मंगळसूत्र आणि कुंकू

स्रीवर लादलेली बंधने

स्त्रीचं गृहकृतदक्ष राहणं

जेन्डर बायस्ड अन् स्टिरिओटाईप

हिजाब अन् बुरखा हर चॉईस

हलाला आणि मुताह विवाह

धार्मिक स्वातंत्र्याचे रितीरिवाज

तीन तलाक धार्मिक अधिकार

वटपौर्णिमा किंवा करवा चौथ

स्रीत्वाच्या गुलामीचं जोखड

मासिक धर्मात स्त्रीची अलिप्तता

म्हणजे स्त्रीत्वाचे शोषण

इद्दाह मात्र धार्मिक पवित्र विधी

"संविधान की मनुस्मृती" नारा असतो प्रोग्रेसिव्ह

"संविधान की शरिया" नारा कम्युनल प्रोपागंडा

सवर्ण दलित फूट म्हणजे हिंदूंचा वर्चस्ववाद

शिया सुन्नी वैर असतो इस्लामी अंतर्गत वाद

सर्वधर्मसमभावाचा वैचारिक विचका

फुर्रोगाम्यांनी केलेला इहवादी पचका

© भूषण वर्धेकर

१० फेब्रुवारी २०२२

पुणे

गांधीगौरव

अहिंसा फक्त पुस्तकी शोभते, शांतीसाठी युद्ध होते

सत्य बोलायला झकास, मात्र सिद्ध करायला नाहक त्रास

अस्तेय गुणधर्म म्हणून श्रेष्ठ, पण इतिहासात बळकावणारेच वरिष्ठ

ब्रम्हचर्य सामाजिक प्रतिमेचे ध्यान, प्रत्यक्षात भोगवादी कायदेशीर सज्ञान

अपरिग्रहात असतात मिरवण्याचे छंद, काबीज करायला संपत्तीचा ताळेबंद

श्रमजीवी संघटीत होतात सत्पर, मजबूरीने गुलामगिरीत रमतात तत्पर

आस्वाद समर्थ अनुभुतीचे बळ, गरजेपेक्षा जास्त हव्यासाचे मूळ

निर्भय होणे प्रगतीचे लक्षण, भीती दाखवणे हे सत्तातुरांचे भक्षण

सर्वधर्मसमभाव आदर्शवत प्रमाण, शोषितांचे मात्र धर्मांतर गतिमान

अस्पृश्यता निर्मूलन सलोख्याचे अनुष्ठान, सत्तेसाठी मात्र जातीपातीचे अनुमान

स्वदेशीची स्विकृती करे राष्ट्र आत्मनिर्भर, सरंजामी घराण्यांचे होई चित्त सैरभैर

वर्चस्वासाठी गांधी लागतात, द्वेषासाठी नथुरामाचा पर्याय

आसुसलेल्या सत्तेत राहण्यासाठी, दोघेही जिवंत ठेवणं अपरिहार्य

©भूषण वर्धेकर

२९ जानेवारी २०२२, रात्री २.१५ AM

अस्मितावाद्यांनी ठोकून काढलं

अस्मितावाद्यांनी ठोकून काढलं

एकदा मी मराठ्यांवर 

विद्रोही कविता केली

महाराष्ट्रातल्या अस्मितावाद्यांनी

मला ठोकून काढलं

मग मी गुजरात्यांवर 

विद्रोही कविता केली

गुजराती अस्मितावाद्यांनी

मला ठोकून काढलं

नंतर मी सरदारांवर

विद्रोही कविता केली

पंजाबी, हरियाणातील अस्मितावाद्यांनी

मला ठोकून काढलं

मग मी चिडून हिंदी भाषिकांवर

विद्रोही कविता केली

उत्तरेतल्या अस्मितावाद्यांनी

मला ठोकून काढलं

थोडसं सावरून तमिळींवर

विद्रोही कविता केली

तमिळनाडूतल्या अस्मितावाद्यांनी

मला ठोकून काढलं

त्वेषाने तेलुगू लोकांवर

विद्रोही कविता केली

आंध्रा, तेलंगणातल्या अस्मितावाद्यांनी

मला ठोकून काढलं

नंतर मी मल्याळींवर

विद्रोही कविता केली

केरळी अस्मितावाद्यांनी

मला ठोकून काढलं

त्यानंतर बंगाली, ओरिया लोकांवर

विद्रोही कविता केली

तिथल्या अस्मितावाद्यांनी

मला ठोकून काढलं

शेवटी मी ईशान्येकडील लोकांवर 

विद्रोही कविता केली

तिकडल्या अस्मितावाद्यांनी पण

मला ठोकून काढलं

सरतेशेवटी मी भारतीयांवर

विद्रोही कविता केली

एकदम सगळ्या सेक्युलरांनी 

माझं कौतुकच केलं

मात्र राष्ट्रवाद्यांनी शोधून

मला ठोकून काढलं

- भूषण वर्धेकर